(EMRI + FOTO) Humbje e madhe për muzikën shqiptare, ndahet nga jeta dirigjenti i njohur

219

Dirigjenti i njohur shqiptar, Milto Vako është ndarë nga jeta ditën e sotme në moshën 90-vjeçare.

Lajmin e hidhur e ka bërë me dije me anë të një postimi faqja zyrtare e Teatrit të Operës dhe Baletit, ku i shpreh ngushëllimet familjarëve, bashkëpunëtorëve dhe miqve të shumtë të artistit të madh, Milto Vako.

Vako la pas një sërë veprash që i dhanë jetë shkollës së muzikës shqiptare.

Njoftimi i TKOB:

“Lamtumirë – Mjeshtrit Milto Vako Me hidhërim të thellë Teatri i Operas, Baletit dhe Ansambli Popullor njofton ndarjen nga jeta të mjeshtrit Milto Vako.

Ai është një nga emrat e nderuar të artin shqiptar në fushën e dirigjimit koral.

Mjeshtri u diplomua në Konservatorin “Cajkovski” në Moskë si dirigjent kori dhe u specializua më pas në Konservatorin e Parisit.

Aktiviteti artistik i tij nisi dekada më parë si mjeshtër i korit të Ansamblit të Këngëve dhe Valleve Popullore dhe më pas si dirigjent i korit të Teatrit të Operës dhe Baletit.

Si drejtues i korit të AKVP, së bashku me trupat ai arriti suksese të cilat kanë mbetur në memorien e publikut brenda dhe jashtë vendit edhe sot, ndër të cilat do të veçonim midis të tjerash: fitues i “Gjerdanit të Artë” të AKVP në Dijon të Francës.

Si mjeshtër kori i TOB përgatiti me profesionalizëm korin e TOB në vepra si “Mrika”, (1966), “Heroina”, (1967), “Skënderbeu”, (1968), etj.

Është një ndër themeluesit e Konservatorit Shtetëror të Tiranës, ku së bashku me figura të tjera të njohura si Çesk Zadeja, Albert Paparisto, Hamide Stringa, Mustafa Krantja, etj, i dhanë jetë shkollës së muzikës shqiptare.

Autor i një seri përpunimesh e krijimesh origjinale korale, shumica e të cilave mbeten përfaqësuese në fondin e literaturës klasike korale shqiptare.

Prej vitit 1990 ai ushtroi detyrën si pedagog në Fakultetin e Muzikës së Universitetit të Arteve.

Në emër të drejtuesve dhe artistëve, TKOB shpreh ngushëllimet më të ndjera, familjes, bashkëpunëtorëve dhe miqve të shumtë të artistit të madh, Milto Vako.

I përjetshëm qoftë kujtimi i tij!”, thuhet në njoftimin e TKOB.

(Descript.al)