(FOTO+EMRI) / Kinematografia shqiptare në zi, ndërron jetë aktori dhe regjisori i njohur durrsak

4692

Një tjetër ikonë e kinematografisë shqiptare është shuar ditën e sotme.

Bëhet fjalë për aktorin dhe regjisorin e njohur durrsak, Gjergj Vlashi, i cili ka ndërruar jetë në moshën 92 vjeçare.

Lajmin e ka bërë të ditur Teatri ‘’Aleksandër Moisiu’’, që shkruan në rrjetet sociale se kjo ishte një humbje e madhe për komunitetin artistik.

“Një humbje e madhe për të gjithë komunitetin artistik, Njeriu që me punën e palodhur ka bërë aq shumë për Teatrin, Estradën, Përkthimin, Letërsinë, na lë sot me një dhimbje të thellë. Për Gjergjin e madh të Durrësit, i paharrueshëm kujtimi i tij”, shkruhet në faqen e Teatrit ‘’Aleksandër Moisiu’’.

Po kush ishte Gjergj Vlashi?

Gjergj Vlashi u lind në Durrës më 13 korrik 1928. Shkollën fillore dhe të mesme e kreu në qytetin e lindjes.

Që në vitet e para të pas luftës u mor me teatrin amator dhe debutoi në disa shfaqje si “Nën gështenjat e Pragës’, “Prefekti”, “Çani hoxhë”, etj.

Pas shërbimit ushtarak punoi si regjisor ne klubin e portit detar dhe në vitin 1957 u emërua regjisor në shtëpinë e kulturës.

Më 5 maj të vitit 1960 u krijua trupa e estradës profesioniste dhe u caktua regjisor, detyrë që e mbajti deri në vitin 1990, kur doli në pension.

Ndërkohë ka punuar me shumë trupa të tjera, duke vënë shfaqje në Tiranë, Shkodër, Korçë, Lushnje, Pogradec, me Estradën e Ushtarit, etj.

Ka punuar për disa vite si pedagog i jashtëm në Institutin e Lartë të Arteve në Tiranë.

Ka marrë pjesë me trupën e Durrësit në shumë festivale, duke fituar disa çmime të para.

Gjithashtu ai është autor i librit “Si vihet në skenë një shfaqje estradë” dhe i shumë artikujve e studimeve për estradën dhe teatrin.

Krahas punës si regjisor ka zhvilluar një veprimtari të dendur letrare, si shkrimtar dhe përkthyes.

Regjisori dhe shkrimtari Gjergj Vlashi është nderuar nga presidenti i Shqipërisë Bujar Nishani me Urdhrin “Nderi i Kombit”.

(Descript.al)